काठमाडौं । दोस्रो टान अन्तर्राष्ट्रिय लाङटाङ म्याराथन आगामी वैशाख दोस्रो साता हुने भएको छ । आयोजक ट्रेकिङ एजेन्सिज एसोसिएसन अफ नेपाल (टान) ले शुक्रबार पत्रकार सम्मेलन गर्दै दोस्रो संस्करणको म्याराथन आगामी वैशाख १२ गते हुने जानकारी गराएको हो ।
टानले २०७२ वैशाख १२ गते गएको भूकम्प गएको दिन पारेर म्याराथन आयोजना गर्न लागेको हो । उक्त भूकम्पले क्षति पुर्याएको लाङटाङ क्षेत्रको पर्यटकीय गतिविधि र पदयात्रा सुचारु भएको तथा सुरक्षित छ भनेर सुचना प्रदान गर्न म्याराथन आयोजना गरिएको टानले जनाएको छ ।
खुला म्याराथनमा पुरुष र महिलाको स्पर्धामा स्वदेशी–विदेशी धावकहरूको सहभागिता रहनेछ । म्याराथन लाङटाङ राष्ट्रिय निकुन्जको क्यान्जिङ गुम्बाबाट सुरू भई गाउँ थाङस्याप, तवेला लामा होटल, रिम्चे, खान्जिम, लिङलिङ हुदै स्याब्रुबेसीमा पुगेर समाप्त हुनेछ ।
दुवै स्पर्धाका विजेताले समान १–१ लाख, उपविजेताले ७५–७५ हजार र तेस्रो हुनेले ५०–५० हजार रुपैयाँ पाउनेछन् । तर, धावकको सङ्खा अहिले नै एकिन नभएको टानका महासचिव कर्णबहादुर लामाले जानकारी दिए । म्याराथनमा सहभागी हुन नेपाली धावकले १७ सय तथा विदेशीले ५० युएस डलर बुझाउनु पर्नेछ ।
टानले गत वर्ष भने लाङटाङ गोसाइँकुन्ड हाफ म्याराथन आयोजना गरेको थियो । समुद्र सहतदेखि ४,३८० मिटरको उचाइमा रहेको गोसाइँकुण्डबाट सुरु भएको हाफ म्याराथनको पहिलो संस्करणको उपाधि पुरुषतर्फ नेपाली सेनाका धावक भरत खत्रीले जितेका थिए। त्यस्तै महिलातर्फ रसुवाकी फूलमाया स्याङ्वाले उपाधि जितेकी थिइन् ।