काठमाडौं । केही वर्षअघि खस्किएको ट्रेडमार्क दर्ता पछिल्लो समय सुधारिँदै गएको छ । सात वर्षयता स्वदेशी र विदेशी गरी १४ हजार ४३८ ट्रेडमार्क दर्ता भएका छन् । 

उद्योग विभागका अनुसार पछिल्लो तीन वर्षमा ट्रेडमार्क दर्तामा निकै सुधार भएको छ । विभागका प्रवक्ता दुर्गाप्रसाद भुसालले भूकम्प, नाकाबन्दी आदिले भने ट्रेडमार्क दर्तामा केही प्रभाव पारेको बताए । “केही महिनायता भने सुधार भएको छ । यसलाई उद्योग क्षेत्रको लागि सकारात्मक रूपमा लिन सकिन्छ,” उनले भने । 

विभागका अनुसार अहिले अघिल्लो वर्षभन्दा ५० प्रतिशत दर्ता संख्या बढेको छ । तीन वर्षअघि १८ सय ६२ ट्रेडमार्क दर्ता भएकोमा यो वर्ष २७ सय ८६ पुगेको छ ।

स्वदेशी ट्रेडमार्क नै बढी दर्ता भएको विभागको तथ्यांक छ । सात अवधिमा ७ हजार ३ सय ६० स्वदेशी तथा ७ हजार ७८ विदेशी ट्रेडमार्क दर्ता भएको छ । निवेदन दिनेमा पनि स्वदेशी नै बढी छन् । विभागले ६० प्रतिशतभन्दा बढी स्वदेशी ट्रेडमार्क दर्ता भएको जनाएको छ ।

प्रवक्ता भुसालका अनुसार ट्रेडमार्कको लागि विभागमा निवेदन आएपछि दाबीविरोधका लागि ९० दिनको सूचना प्रकाशित गरिन्छ । “कुनै पनि दाबी विरोध आएन भने निवेदन दिएको करिब ६ महिनाभित्र उद्योगहरुले आफ्नो ट्रेडमार्क पाइसक्छन्,” उनले भने, “तर दाबी विरोध पर्यो भने प्रक्रिया लम्बिन्छ ।” ट्रेडमार्क दर्ता गर्न ५ हजार रुपैयाँ शुल्क लाग्ने उनले बताए । 

७ वर्षमा दर्ता भएको ट्रेडमार्क
२०१० : स्वदेशी ८९३, विदेशी ७२९
२०११ : स्वदेशी ७६२, विदेशी ६१९
२०१२ : स्वदेशी १००१, विदेशी ९२३
२०१३ : स्वदेशी १५१९, विदेशी १०९१
२०१४ : स्वदेशी ९०९, विदेशी ९५३
२०१५ : स्वदेशी ११०७, विदेशी ११४६
२०१६ : स्वदेशी ११६९, विदेशी १६१७