काठमाडौँ । स्थानीय निर्वाचनमा ‘बागी’ ‘विद्रोही’ उठे एमालेले ‘अन द स्पट’ कारवाही गर्नेगरी उमेदवार छनोटको कार्यविधि निर्धारण गरेको छ । बिहीबार बसेको पार्टी स्थायी कमिटीको बैठकलेल बागी विद्रोही उठ्नेलाईमात्र होइन प्रस्तावक र समर्थक बस्नेको समेत सदस्यता खारेज गर्ने गरी कार्यविधि तोकेको हो । 

त्यस्तै बैठकले स्थानीय तहमा उम्मेदवार छनौट गर्दा लोकप्रिय, आर्थिक अनुशासनको परिपालना गर्ने, भ्रष्टचारमा असंलग्नहरूलाई मात्र उमेदवार बनाउने विधि तय गरेको छ ।

त्यस्तै स्थानीय विकास निर्माणको काम, जनताको उत्तरदायित्व बहन गर्न सक्ने, पार्टीको उद्देश्यप्रति कर्तव्यनिष्ठ, बफादारहरूमात्र उमदवार बन्न सक्ने एमाले सचिव एवम् प्रचार विभाग प्रमुख योगश भट्टराईले जानकारी दिए ।  त्यस्तै उमेदवार छनोट गर्दा ‘समावेशीता’ लाई पनि ध्यानमा दिन सम्बन्धित कमिटीलाई एमालेको निर्देशन छ । 

बैठकले वडाध्यक्ष र  वडा सदस्यको उमेदवार जिल्लाले टुंगो लगाउने निर्णय गरेको छ । त्यस्तै गाउँपालिका, नगरपालिकाको प्रमुख र उपप्रमुख सम्बन्धित कमिटीको राय, सुझाव र सिफारिसको आधारमा प्रदेशले निर्णय गर्ने र उपमहानगर र महानगरपालिकाको मेयर, उपमेयरचाहिँ केन्द्र्रले नै तय गर्ने छ ।

बैठकले चार महिने, मेची–महाकाली अभियानको समीक्षा गर्दै कार्यक्रम फलदायी भएको निष्कर्ष निकालेको छ । त्यस्तै सम्पूर्ण पार्टी पंक्तिलाई स्थानीय निर्वाचनमा विजय लक्ष्यसहित होमिन निर्देशित गरेको भट्टराईको भनाइ छ ।