काठमाडौं । राजधानीको न्युरोडस्थित मख्खन गल्लीमा साडी तथा कुर्तासुरुवालको कारोबार गर्ने श्यामसुन्दर अग्रवालको अपहरण गर्ने मुख्य योजनाकार धादिङकी राधिका श्रेष्ठलाई उनकै प्रेमीले हत्या गरेको रहस्य खुलेको छ । 

गएको फागुन ५ गते श्यामसुन्दरलाई उनकै पसलमा काम गर्ने र उनकै सहयोगी राधिकाले होटलमा बोलाएर बन्धक बनाई १० लाख ७० हजार फिरौती रकम असुलेको र त्यही रात उनै राधिकाको उनकै प्रेमी प्रकाश लामिछानेले हत्या गरेको प्रहरी अनुसन्धानबाट खुलेको छ । 

महानगरीय अपराध महाशाखाका प्रमुख एसएसपी दिनेश अमात्यका अनुसार फागुन ५ गते दिउँसो १ बजेतिर अग्रवालकी विश्वासपात्र राधिकाले अग्रवाललाई सुनधारास्थित सनराइज गेष्टहाउसमा खाजा खान बोलाइन् । होटलमा दुईवटा कोटा बुक गरिएको रहेछ । 

एउटा कोठामा अग्रवाल र राधिका अनि अर्को कोठामा अपहरणको योजना बनाउने प्रकाश लामिछाने, किशोर गिरी र सरोज घोरासैनी थिए । राधिकाले अग्रवाललाई मदिरा खुवाएर लठ्ठ बनाइन् । अग्रवाल मदिराले लठ्ठ भएको बेला अर्को कोठाबाट तीनजना निस्के र मुखमा टेप अनि हातखुट्टा बाँधे । त्यसपछि पैसा माग्न थाले । 

महाशाखाका डीएसपी अजय केसीका अनुसार अग्रवालसँग ७० हजार रुपैयाँमात्र रहेछ । अरु पैसा लिन राधिका आफैँ साडी पसल गइन् । पसलबाट राधिकाले २ लाख नगद र अग्रवालको चेक लिएर आइन् । 

अग्रवालबाट अपहरणकारीले २ लाख ७० हजार नगद लिए र ८ लाखको चेक काट्न लगाए । राधिकाले पनि आफू फस्न सक्ने भन्दै चेक छिमेकी पसलेको नाममा काट्न लगाइन् । उनले जसको नाममा चेक काट्न लगाएकी थिइन्, ती भारतीय नागरिक थिए । भारतीय भएकाले बैंकले नमानेपछि फेरि उनले भक्तपुरबाट एकजनालाई झिकाइन् र उक्त रकम सोही दिन निकालेर लगिन् । अग्रवाललाई त्यही होटलको कोठामा बाहिरबाट ताला लगाएर छाडियो । उनीहरु भागिसकेपछि बल्ल होटलका कर्मचारीले चाल पाए अनि प्रहरीलाई खबर गरे । डीएसपी केसीका अनुसार उनीहरू चारै जनाले २ लाखका दरले रकम बाँडे ।

घटनापछि चारैजनाले वसन्तपुरमा बसेर पैसा बाँडे । त्यसपछि सरोज घोरासैनी र किशोर गिरी ट्याक्सी चढेर कालीमाटी हुँदै भक्तपुर गए । राधिका र उनका प्रेमी प्रकाश पनि बाटो छुट्टै गरेर भक्तपुर नै गए । उनीहरुको योजना त्यो साँझ भक्तपुरमा प्रकाशको घरमा रमाइलो गर्ने थियो । 

प्रकाशको घर भक्तपुर बागेश्वरीमा हो । सबै जना त्यहीँ जम्मा भए घटनाको बारेमा अन्यलाई जानकारी हुन सक्ने भन्दै प्रकाशले किशोर र सरोजको सहयोगमा प्रेमिका राधिकालाई प्रकाशकै घरको कोठामा हत्या गरे अनि नजिकै लगेर गाडे । घटनाको भोलिपल्ट प्रकाश प्लेन चढेर दिल्ली हानिए । उनका सहयोगी किशोर गिरी पनि केही दिनपछि स्थलमार्ग हँुदै भारत गए अनि केही दिनमै नेपाल फर्किए ।

महाशाखाको टोलीले गिरी भारतबाट नेपाल आउँदै गरेका बेला त्रिभुवन विमानस्थलबाट बुधबार पक्राउ गर्यो । सरोज घोरासैनी पनि असनबाट पक्राउ परे । प्रकाश लामिछाने भने अझै फरार रहेको महाशाखाले जनाएको छ । 

‘पैसा कमाउनकै लागि राधिकालाई प्रेमिका बनाएको रहेछ’
अनुसन्धान अधिकारीका अनुसार प्रकाश लामिछानेले पैसा कमाउनकै लागि राधिकालाई प्रेमिका बनाएको रहस्य खुलेको छ । 
प्रकाशको वसन्तपुर गणेश थाननजिकै मोबाइल मर्मत पसल छ । राधिका त्यही बाटोबाट आउजाउ गर्दा उनीहरुको चिनजान भएको थियो । पैसावाल साहुकी सहयोगी भन्ने चाल पाएपछि प्रकाश नै उनको पछि लागेका थिए । अन्ततः उनले साहुलाई जालमा पारेर रकम असुल्न आफ्नै प्रेमिकाको प्रयोग गरे । 

राधिका श्यामसुन्दरको पसलमा काम गर्ने कर्मचारीमध्येकी विश्वासी पात्र हुन् । उनले अग्रवालको हिसाबकिताबका बारेमा सबै कुरा थाहा पाउने भएका कारण प्रकाशले राधिकालाई प्रेमिका बनाएर उनकै माध्यमबाट अपहरण गरी बन्धक बनाएर फिरौती रकम असुल्ने योजना बनाएको र त्यहीअनुसार रकम असुलेको अनुसन्धानबाट खुलेको छ । 

पोल खुल्ने डरले प्रेमिकाको हत्या
घटनाको पोल खोल्ने डरले प्रकाशले प्रेमिका राधिकाको हत्या गरेको प्रहरीको निष्कर्ष छ । अपहरण तथा बन्धकमा सहयोगी भूमिका खेल्ने सरोज घोरासैनी प्रकाशका मामाका छोरा हुन् भने किशोर उनका साथी हुन् । उनीहरु सबै मिलेर अग्रवालबाट रकम लिएपछि राधिकाको हत्या गर्ने योजना बनाएको प्रहरी अनुसन्धानबाट खुलेको छ ।

राधिकाको शव प्रहरीले फागुन २० गते नै फेला पारे पनि अभियुक्तहरू फरार भएका कारण अनुसन्धान जारी राखेको थियो । प्रहरीले बिहीबार अभियुक्तहरुलाई सार्वजनिक गरेको छ । उनीहरुलाई थुनामा राखेर थप अनुसन्धान भइरहेको प्रहरीले जनाएको छ ।