काठमाडौं । यदि तपाईंलाई आफू प्रेमको मामिलामा अझै पनि सिकारू रहेझैं लाग्छ भने तपाईंले डाक्टर मेगन पाइको ‘लभ क्लास’ मा नाम लेखाउनोस् । द गार्जियनमा छापिएको एउटा आलेखमा बताइएअनुसार, डा. मेगन पाइले न्यूयोर्क विश्वविद्यालयमा एउटा अन्डरग्य्राजुएट लभ कोर्स पढाउँछिन्, जसलाई उनी स्वयंले बनाएकी हुन् । यो कोर्स विद्यार्थीमाझ निकै लोकप्रिय बनेको छ र यो पढ्नका लागि नाम लेखाउने छात्रहरूको सङ्ख्या दुई वर्षकै बीचमा तीन गुना बढेको छ । डा.मेगन पाइ ४२ वर्षकी साइकाइट्रिस्ट र एसोसियट प्रोफेसर हुन् । उनले निजी स्तरमा एउटा थेरापी केन्द्र पनि चलाउँछिन् ।
गार्जियनमा छापिएको रिपोर्टअनुसार, यस कोर्सको नाम ‘लभ एक्चुअल्ली’ हो र यसको पहिलो सेमेस्टर मुख्यतया प्रेमको मानवीय अनुभवमा आधारित छ । यो कोर्स दुई मनोवैज्ञानिक दिशाहरूतिर अघि बढ्छ– होरिजेन्टल्ली र भर्टिकल्ली । यस कोर्सको भर्टिकल दिशामा हुने पढाइमा एक जना मान्छे र उसको पारिवारिक प्रेम, सामूहिक प्रेम र फेरि सार्वभौमिक प्रेमको विषयवस्तु रहेको छ । होरिजेन्टल पढाइमा चाहिँ एक व्यक्तिको जीवनकालमा कस्ता–कस्ता खालका प्रेमसँग सम्बन्धित नातासम्बन्धहरू रहन्छन् भन्ने कुरा पढाइन्छ ।  
यो कोर्सको आइडिया कसरी आयो भन्ने प्रश्नको उत्तरमा डा. पाइले भनेकी छन्, ‘‘न्यूयोर्क विश्वविद्यालयमा मलाई ‘लभ एन्ड इन्टिमसी’ अर्थात् ‘प्रेम र आत्मीयता’ शीर्षकमा लेक्चर दिनका लागि बोलाइएको थियो । लेक्चरपछि केही विद्यार्थीहरू मसँग आए र सोधे– यस विषयमा कुनै कोर्स छ कि छैन ? उनीहरूको रुचिका आधारमा मैले तीन जना बाल मनोवैज्ञानिक साथीहरूको सहयोग लिएर यो कोर्स बनाएँ । छिटै मलाई के महसुस भयो भने मसँग थुप्रै पाठ्यसामग्रीहरू छन् । मैले आप्mनो जिन्दगीमा धेरै कुरा जम्मा गरेकी छु । पछि न्यूयोर्क विश्वविद्यालयको ‘चाइल्ड एन्ड ऐडलसेन्ट मेन्टल हेल्थ स्टडी’ विभागअन्तर्गत यो कोर्स सुरु भयो । यसमा मनका अलग–अलग पक्षहरूका आधारमा कक्षा सञ्चालन हुन्छ, जस्तै : ह्याप्पिनेसका बारेमा एउटा कक्षा चल्छ भने निद्राका बारेमा अर्को कक्षा चल्छ ।’’
नवभारत टाइम्सबाट