काठमाडौं । प्रधानमन्त्री पुष्पकमल दाहालको चीन भ्रमणमा क्रममा कुनै दुईपक्षीय सन्धि सम्झौता नहुने परराष्ट्र मन्त्री डा. प्रकाश शरण महतले प्रष्ट पारेका छन् ।
भ्रमणका क्रममा यसअघिको सरकारले गरेको यातायात, व्यापार तथा पारवहन सम्झौताको प्रोटोकलमा र वन वेल्ट वन रोड (ओबीओआर) मा लिखित सम्झौताको तयारी गरेको थियो । तर, प्रधानमन्त्री चीनमा रहँदा उनका समकक्षी देश बाहिर हुने भएकाले यस्तो भएको हो ।
“हामीले विभिन्न सम्झौताको तयारी गरेका थियौं,” भ्रमणबारे जानकारी दिन परराष्ट्र मन्त्रालयले आयोजना गरेको पत्रकार भेटघाटमा मन्त्री महतले भने, “प्राविधिक कारणले कुनै प्रकारको सम्झौता हुने छैन । दुई पक्षीय छलफलमा आउने प्रतिवद्धताअनुसार पछि हस्ताक्षर हुनेछ ।”
दुई देशबीच विगतमा भएका सन्धि सम्झौताहरु कार्यान्वयनमा नेपाल सरकारको पूर्ण प्रतिवद्धता रहेको पनि बताएका छन् ।
बिहीबारदेखि चीनको हाइनान प्रान्तमा सुरु हुने बोवाओ फोरम फर एसियामा सहभागी हुन चीन जान लागेका प्रधानमन्त्री दाहालले चीनका राष्ट्रपति सि चिनफिङसँग बेइजिङमा भेट गर्ने कार्यक्रम रहेको छ ।
राष्ट्रपति सि सँगको भेटको दिन र समय भने उल्लेख गरिएको छैन । बोवाओ सम्मेलन उद्घाटन सत्रमा प्रधानमन्त्री दाहालले चिनियाँ उपप्रधानमन्त्री झयाङ् गाओलीसंग भेट गर्ने तालिका नेपालको परराष्ट्र मन्त्रालयले सार्वजनिक गरेको छ । मार्च २४ मा बोआओ सम्मेलनलाई सम्बोधन गरि प्रधानमन्त्री दाहाल राजधानी बेइजिङ जानेछन् ।
बेइजिङ्मा रहँदा प्रधानमन्त्री दाहालले चिनियाँ राष्ट्रपति सि का अलवा व्यापारीक मण्डलसँग भेट र छलफल गर्ने र बेइजिङ फरेन स्टडिज युनिर्भसिटिमा सम्बोधन गर्ने कार्यक्रम रहेको जनाइएको छ ।
नेपाल फर्किनुअघि प्रधानमन्त्री दाहालले चीनको स्वशासित क्षेत्र तिब्बतको पनि भ्रमण गर्ने र सोही अवसरमा तिब्बत सरकार नेताहरुसँग भेट गर्ने जनाइएको छ ।
यस्तो छ परराष्ट्रले सार्वजनिक गरेको भ्रमणतालिका
सम्माननीय प्रधानमन्त्री श्री पुष्पकमल दाहाल 'प्रचण्ड' Boao Forum for Asia का महासचिव H.E. Zhou Wenzhong को निमन्त्रणामा चीनको हाइनान प्रान्तको बोआओ शहरमा यही मार्च २३-२६, २०१७ तदनुसार मिति २०७३ चैत्र १० देखि १३ सम्म हुन लागेको सो फोरमको वार्षिक सम्मेलनको उद्घाटन समारोहमा सहभागी हुन मिति २०७३ चैत्र १० गते देखि चीनको भ्रमण गर्नुहुने।
- सम्मानीय प्रधानमन्त्रीज्यूको भ्रमणदलमा पत्नी सीता दाहाल, माननीय परराष्ट्र मन्त्री डा. प्रकाश शरण महत, परराष्ट्र सचिव श्री शंकरदास बैरागी तथा मन्त्रालयका अन्य उच्च पदाधिकारीहरु सम्मिलित हुने ।
- बोआओमा रहँदा मार्च २४, २०१७ मा तदनुसार मिति २०७३/१२/११ मा सम्माननीय प्रधानमन्त्रीज्यूले चीनका उपप्रधानमन्त्री H.E. Zhang Gaoli सँग द्विपक्षीय छलफल गर्नुहुने। बोआओमा मार्च २५, २०१७ तदनुसार मिति २०७३/१२/१२ मा "Globalization and Free Trade: Asian Perspectives" विषयमा सम्माननीय प्रधानमन्त्रीले बोआओ मञ्चको उद्घाटन समारोहमा सम्बोधन गर्नुहुने। सोही दिन अपरान्ह उहाँ बेइजिङको लागि प्रस्थान गर्नुहुने।
- सम्माननीय प्रधानमन्त्रीले भ्रमणका अवसरमा जनवादी गणतन्त्र चीनका महामहिम राष्ट्रपति सि जिनपिङसँग शिष्टाचार भेट गर्नुहुने।सो भेटमा द्विपक्षीय सम्बन्धलार्इ अझ विस्तार र सुदृढ गर्ने विषयमा कुराकानी हुनेछ।
- मिति मार्च २६, २०१७ तदनुसार मिति २०७३/१२/१३ मा सम्माननीय प्रधानमन्त्रीले "Nepal-China Relations; Prospects for Growth and Prosperity" विषयमा Beijing Foreign Studies University मा विभिन्न विद्वान, शिक्षाविद्, व्यवसायी तथा विद्यार्थीहरुलाई सम्बोधन गर्नुहुने र उक्त विश्वविद्यालयको परिसरमा स्थापित नेपाल अध्ययन केन्द्रको उद्घाटन गर्नुहुने।साथै सोही दिन चिनियाँ व्यापारी समुदायलाई सम्बोधन गर्नुहुने।
- तत्पश्चात् सम्माननीय प्रधानमन्त्रीज्यूले जनवादी गणतन्त्र चीनको तिब्बत स्वशासित क्षेत्रको भ्रमण गर्नुहुने र सो अवसरमा तिब्बत सरकारका नेताहरुसँग भेट गर्नुहुने।उक्त भेट नेपाल र तिब्बत सरकारबीच स्थानीय तहमा विद्यमान द्विपक्षीय संयन्त्रहरु थप क्रियाशील बनाउने विषयमा केन्द्रित हुने।
- सम्माननीय प्रधानमन्त्री तथा उहाँको भ्रमणदल मार्च २९, २०१७ तदनुसार मिति २०७३/१२/१६ मा ल्हासाबाट स्वदेश फर्कनुहुने।
- दुई देशबीच विगतमा भएका सन्धि सम्झौताहरुको कार्यान्वयनमा नेपाल सरकारको पूर्ण प्रतिवद्धता रहेको।
- यो भ्रमणका अवसरमा कुनै सन्धि, सम्झौता, समझदारीमा हस्ताक्षर गर्ने कार्यक्रम छैन।द्विपक्षीय सम्बन्ध र सहायतामा धेरै महत्वपूर्ण विषयवस्तुहरुमा हाम्रो तर्फबाट तयारी पूरा भएको छ। निकट भविष्यमा यी विषयहरुमा सहमति भर्इ हस्ताक्षर हुने हाम्रो विश्वास रहेको छ।