ग्याङस्टार चलचित्र ‘लप्पन छप्पन’ यही शुक्रबारबाट प्रदर्शनमा आउँदैछ । मुकुन्द भट्टको डेब्यु निर्देशनमा बनेको चलचित्रमा अहिलेका चल्तीका नायकहरू सौगात मल्ल र दयाहाङ राई आदि स्टार कलाकारको अभिनय छ । ७५ प्रतिशत छायाङ्कन नेपाल बाहिर गरिएको उक्त चलचित्रको कथावस्तु र परिवेश कस्तो छ अनि चलचित्रले के सन्देश दिन्छ ? साथै पछिल्लो समयका चलचित्र किन पैसाका पछाडि दौडिरहेका छन् ? यी र यस्तै विषयमा केन्द्रित रहेर निर्देशक भट्टसँग गरिएको कुराकानी :
चलचित्र रिलिजको पूर्वसन्ध्यामा हुनुहुन्छ, कस्तो अनुभूति भइरहेको छ ?
एक्साइटेड छु । दुई वर्षदेखिको मेहनतको फल यही चैत ११ गतेबाट आउँदैछ, त्यसैले प्रतिक्रिया सुन्न एक्साइटेड छु । हामीले हाम्रा तर्फबाट कुनै ‘लुप होल’ नरहने गरी सीमान्त मेहनत गरेका छौं । दर्शकको प्रतिक्रियाको प्रतीक्षामा बसिरहेको छु ।
पछिल्लो समय चलचित्र तयार भइसकेपछि ‘स्याम्पलिङ अडियन्स’ लाई देखाउने चलन छ । तपाईंले देखाउनु भयो कि भएन ? देखाउनु भएको भए कस्तो प्रतिक्रिया पाउनु भयो ?
छैन । मैले बाहिर कसैलाई पनि देखाएको छैन । हाम्रो निर्माण युनिटले मात्रै हेरेका छौं । जति पनि हामीले हेरेका छौं, सबैलाई राम्रो लागेको छ । चित्त नबुझेको कोही पनि छैन । यसलाई आधार मान्ने हो भने राम्रो प्रतिक्रिया आयो भन्न मिल्छ होला । तर, दर्शकको प्रतिक्रिया बुझ्न त अझै कुर्नै पर्छ । मसहित मेरो सम्पूर्ण युनिटले राम्रो काम गरेका छौं, त्यसैले राम्रो प्रतिक्रियाको अपेक्षा छ ।
पछिल्लो समय राम्रो भनेर अपेक्षा गरेका चलचित्र नै चलेनन् । दर्शकको मनोविज्ञानका कारण लगत्तैको अर्को चलचित्रमा पनि त्यसको प्रभाव पर्छ भनिन्छ नि ! तपाईं यसमा विश्वास गर्नुहुन्छ ?
‘लप्पन छप्पन’ ले भोलि व्यापार गर्ला–नगर्ला, त्यो पछाडिको कुरा भयो । तर, कम्तिमा ‘मुकुन्द भट्टले राम्रो चलचित्र बनाएको रहेछ, नेपालमा पनि राम्रो चलचित्र बन्दो रहेछ’ भनेर दर्शकले भन्दिनुभयो भने हुन्छ । मेरो चलचित्रले १०-१२ करोड कलेक्सन गरोस् भन्ने मनोविज्ञान बोकेको पनि छैन ।
‘हाइ कलेक्सन’ को अपेक्षा गरेको छैन भन्नुभयो । चलचित्र व्यवसाय हो भने लगानीकर्ताले त लगानी सुरक्षित गर्न चाहन्छ नि, हैन ?
हामीले ‘लप्पन छप्पन’ मा ग्याङ स्टारलाई बढी नै खेलाएका छौं । समाजमा अहिले भइरहेका विकृति र विसङ्गतिलाई समेटेका छौं । हलिउड बलिउडका चलचित्र हेर्न हामीलाई बानी परिसकेको छ । यस्तो अवस्थामा हामीले पनि त्यस्तै खालको चलचित्र बनाउनुपर्छ भनेर मैले आधुनिक प्रविधिको प्रयोग गरेको छु । कथा मात्रै होइन, प्रविधिगत हिसाबले पनि मैले राम्रो चलचित्र बनाएको छु ।
प्रविधिलाई प्राथमिकता दिइएका भनिएका कतिपय चलचित्रमा कथा गौण भएका र ‘लाउड’ सुनिएका छन् नि ! कतै ‘लप्पन छप्पन’ मा पनि त्यही समस्या त देखिने हैन ?
मेरो चलचित्र त्यस्तो छैन । यो चलचित्र हेर्दा सुरुदेखि अन्तिमसम्म दर्शकले ‘बोर फिल’ गर्नुहुन्न भन्नेमा म पूरै विश्वस्त छु । मैले आपैंm दशैक भएर हेर्दा पनि त्यो फिल गरेको छैन । हामीले दर्शकलाई दुई घण्टा मनोरञ्जन दिने हो । चलचित्र त्यही दिशामा सरसर बगेको छ ।
ट्रेलर हेर्दा चलचित्रले ‘रोबरी’ को विषय उठाएजस्तो देखिन्छ नि, हो ?
हैन, यो रोबरीको कथा हैन । यसमा बैङ्क लुटिँदैन । प्रविधिको प्रयोग गरेर केसम्म गर्न सकिन्छ भनेर देखाउन खोजिएको छ । लुटपाटको कथा हैन यो ।
पछिल्लो समय ‘रोबरी’ होस् या अन्य कुनै माध्यमबाट, जसरी पनि पैसा कमाउनुपर्छ भन्ने कथा चलचित्रले उठाइरहेका छन् । यसले सामान्य दर्शकको दिमागमा कस्तो असर पार्छ ?
मेरो चलचित्रले सन्देश पनि बोकेको छ । पैसाको लप्पन–छप्पन हो । कसरी पैसा निकाल्ने, व्यवस्थित तरिकाले निकाल्ने प्रविधि छ कि छैन, कुन प्रविधिबाट कसरी निकाल्ने हो ? र, अन्तिममा के गर्न हुन्छ र के गर्न हुँदैन ? भन्ने सन्देश दिन्छ । के गरे, के हुन्छ भन्ने पनि सन्देश दिन्छ । तर चलचित्रका प्रत्येक दृश्य र संवाद एकअर्कासँग रिलेटेड भएकाले सुरुदेखि अन्तिमसम्म ध्यान दिएर हेर्नुपर्छ । नत्र चलचित्र बुझ्न गाह्रो हुन्छ । तपाईंको सञ्चारमाध्यमबाट म दर्शकहरूलाई यो कुराको आग्रह गर्छु ।
सकारात्मक कि नकारात्मक असर पार्छन् यस्ता कथाले ?
सबै मान्छेको लक्ष्य पैसा कमाउने नै हुन्छ । यो मान्छेको जन्मजात गुण नै हो । पैसा नभएकालाई कसरी पैसा कमाउने भन्ने हुन्छ । अर्बौं पैसा भएकालाई त्योभन्दा धेरै अझै कसरी कमाउने भन्ने हुन्छ । हरेक व्यक्तिमा भइरहेको यही हो । यसलाई केही ‘फिक्सनलाइज’ गरेको छु । चलचित्रले सन्देश पनि दिन्छ । त्यसैले यसले सकारात्मक असर पार्छ भन्ने नै हो ।
हाम्रो चलचित्रमा पनि एउटा गरिब पात्र हुन्छ, अर्को धनी । पैसा कमाउने मान्छेको ‘नेचर’ अनुसार यसकै पछाडि चलचित्र घुम्छ । बाँकी कथा सस्पेन्स नै राखौँ ।
‘लप्पन छप्पन’ बाट कस्तो अपेक्षा गर्नु भएको छ ?
यो मेरो पहिलो कमर्सियल चलचित्र भएकाले पक्कै पनि राम्रो काम गरेको छु । यसले राम्रो चलचित्र बनाउँदो रहेछ भन्ने सन्देश पनि मैले दिनुछ । त्यसैले पक्कै पनि सकारात्मक प्रतिक्रियाको अपेक्षा गरेको छु ।
अहिलेका स्टारहरूलाई लिनुभयो । कथाले मागेर हो कि व्यावसायिकताका लागि जबर्जस्ती स्टारहरूलाई लिनुभएको हो ?
उहाँहरूलाई साइन गराउनुभन्दा ६ महिना पहिले मैले स्क्रीप्ट तयार पारिसकेको थिएँ । छायाङ्कन सुरु गर्नुअगाडि लोकेसन खोज्न म बाहिर गएँ । लोकेसन निश्चित भएपछि ‘वर्कआउट’ गरेर कुन चरित्रका लागि को उचित हुन्छ भनेर नै सौगात मल्ल, दयाहाङ राई, अर्पण थापालाई लिएका हौं । सुरुमै कलाकार चयन गरेर स्क्रीप्ट लेखेको होइन ।
ट्रेलरमा नेपाल बाहिरको लोकेसन पनि देखिन्छ । कहाँको लोकेसन हो ?
बेल्जियम, हल्यान्ड, फ्रान्स र स्वीटजरल्यान्डमा छायाङ्कन गरेका छौं । ७५ प्रतिशत छायाङ्कन बाहिर र बाँकी नेपालमा गरिएको हो ।
दर्शकलाई के भन्नुहुन्छ ?
चैत ११ बाट नेपालभरका थिएटरमा चलचित्र प्रदर्शन हुँदैछ । हेरेर प्रतिक्रिया दिन दर्शकसामु मेरो आग्रह छ । ‘लप्पन छप्पन’ ले दर्शकलाई दुई घण्टा आनन्ददायक स्वस्थ मनोरञ्जन दिन्छ भन्ने विश्वास पनि दिलाउन चाहन्छु ।