काठमाडौं । नेपालका थिएटरमा चलचित्र ‘लुट–२’ हाउसफुल हुँदा अमेरिकामा पनि चलचित्रले राम्रो अकुपेनसी पाएको छ । आइतबारबाट अमेरिकामा प्रदर्शनमा आएको ‘लुट–२’ ले ६५ वटा सो पाएको वितरक कम्पनी ‘प्लानेट–३’ का प्रमुख अर्जुन सुवेदीले जानकारी दिए । आइतबार १८ मध्ये १५ वटा सो हाउस फुल भएका सुवेदीको दाबी छ । सुवेदीले १०० वटा सो पुर्याउने लक्ष्य रहेको बताए ।
सोमबार सन्फ्रासिस्कोमा सबै पर्दा हाउसफुल भएको सुवेदीले जानकारी दिए । ‘लुट–२’ को अमेरिका राइट्स ‘प्लानेट–३’, ‘नेप सिने’ र ‘ड्रिम–२७’ ले लिएका हुन् ।
सुवेदीले अमेरिकामा नेपाली रहेका ४० राज्यमा चलचित्र लाग्ने जानकारी दिए ।
अमेरिमा प्रति टिकट १५–२० डलर लिने गरिएको छ । चलचित्र हलिउड तथा बलिउड मुभी लाग्ने हलमा प्रदशर्न भइरहेको छ । सुरुका वर्षमा नेपाली चलचित्र प्रोजेक्टरमा देखाउने गरिए पनि पाइरेसी बढ्दैगएपछि थिएटर बुकिङ गरेरै नेपाली चलचित्र प्रर्दशनमा आउन थालेका छन् ।
निश्चल बस्नेत निर्देशित चलचित्रमा सौगात मल्ल, दयाहाङ राई, कर्मा शाक्य, प्रदीपराज न्यौपाने, विपिन कार्की, सुशिलजङ पाण्डे, सिर्जना सुब्बा र ऋचा शर्मा मुख्य भूमिकामा छन् ।
विद्यमान अस्थिर राजनीतिक अवस्था, मौलाउँदो कालोबजारी र त्यसको परिणाम नै ‘लुट–२’ को ‘लगलाइन’ हो । नाकाबन्दीको मौका छोपेर तत्कालीन समयमा भएको कालो बजारी चलचित्रले छर्लङ्ग पारिदिएको छ ।
‘लुट–२’ चार वर्ष अगाडि प्रदर्शनमा आएको चलचित्र ‘लुट’ को सिक्वेल हो । चलचित्रबारे मिश्रित समीक्षात्मक टिप्पणी आइरहेको छ ।