काठमाडौं । अमेरिकी राष्ट्रपति डोनाल्ड ट्रम्पले यो वर्षको ‘ह्वाइट हाउस करेसपोन्डेन्ट्स एसोसिएशन’ ले आयोजना गर्ने डिनर पार्टीमा उपस्थित नहुने जनाएका छन् । उनले ट्वीटमार्फत यस्तो जानकारी गराएका छन् ।
अप्रिल २९ का लागि यो डिनर तय गरिएको थियो । यस्तो पार्टीमा साधारणतया पत्रकार, सेलिब्रेटी तथा राष्ट्रपति उपस्थित हुने गर्दछन् ।
शुक्रबार धेरै मुख्य प्रशारण तथा अखबारहरुलाई ह्वाइट हाउसमा आयोजित पत्रकार सम्मेलनमा प्रतिबन्ध लगाएपछि ट्रम्पले भाग नलिने बताएका हुन् । ट्रम्पले आफूविरूद्ध नकारात्मक समाचार लेख्ने माध्यमहरुलाई यसअघि फेक न्युज भन्दै आएका छन् ।
केही मिडिया संस्थान र ह्वाइट हाउसबीच असमधुर सम्बन्धलाई मध्यनजर गर्दै ट्रम्पले यस्तो फैसला गरेको आँकलन गरिएको छ ।
शुक्रबार बीबीसी, न्यु योर्क टाइम्स र सीएनएन समेत धेरै प्रमुख मिडिया समूहका पत्रकारलाई ट्रम्पका प्रवक्ता सिन स्पाइसरको प्रेस वार्तामा भाग लिन प्रतिबन्ध लगाइएको थियो ।
ब्लुमबर्ग न्युज, न्युयोर्कर म्यागेजिन लगायतले यसअघि नै ट्रम्पको मिडियाप्रतिको रवैया हेर्दै यो आयोजनाबाट हात झिकिसकेको छ ।
ट्रम्पले उनको आलोचना गरेर समाचार लेख्ने अमेरिकी मिडियालाई अमेरिकी जनताका दुश्मन भन्दै आएका छन् ।
‘ह्वाइट हाउस करेसपोन्डेन्ट्स एसोसिएशन’ ले लगभग एक सय बर्षदेखि राष्ट्रपतिको सम्मानमा रात्रिभोज आयोजना गर्दै आइरहेको छ र यसमा राष्ट्रपति उपस्थित हुँदै आएका थिए ।