काठमाडौं । खेलकुदको माध्यमबाट महिलाको स्तन क्यान्सरविरुद्ध जनचेतना वृद्धि गर्ने उद्देश्यले राजधानीमा पिङकाथन दौड प्रतियोगिता सम्पन्न भएको छ । नेपाल एथलेटिक्स संघ र लेजर पोर्टको सहकार्यमा शुक्रबार रगशालामा पिङकाथन दौड भएको हो ।

महिलामात्र सहभागी दशरथ रंगशालामा आयोजना भएको पिङकाथनमा विभिन्न ४ स्पर्धामा प्रतिस्पर्धा भएको थियो । जसमा करिव २५ सय महिलाहरूको सहभागिता रहेको आयोजकले जनाएको छ  ।

अन्तर्राष्ट्रिय एथ्लेटिक्स संघको नियमअनुसार भएको दौडअन्तर्गत २१ किलोमिटरको हाफ म्याराथन एपीएफ क्लबकी कान्छीमाया कोजुले जितिन् । कान्छीले निर्धारित दुरी १ घन्टा १८ मिनेट  १० सेकेन्डमा पुरा गरिन् । यो कान्छीमायाको राष्ट्रिय कीर्तिमान हो । कान्छीले यसअघि सन २००६ को बर्लिन म्याराथनमा निर्मला भारतीलले बनाएको किर्तिमान भङग गरेकी हुन् । हाफ म्याराथनतर्फको उपाधिसँगै कान्छीमायाले ५० हजार पुरस्कार प्राप्त गरिन् । 

हाफ म्याराथनतर्फ आर्मी क्लबकी रेशु बस्नेतले दोस्रो स्थान हात पारिन् । बस्नेतले निर्धारित दुरी १ घन्टा २२ मिनेट ४३ सेकेन्डमा पूरा गरिन् । उनले २० हजार पुरस्कार प्राप्त गरिन् । २१ किमीको दौडमा पहिलो र दोस्रो भएकी कान्छी र रेशुले भारतमा हुने पिङकाथन इन्डिया सहभागिता जनाउन पाउनेछन् । उक्त दौडमा जाने खेलाडीको सम्पूर्ण खर्च आयोजकले बेहोर्ने छन् । 

तेस्रो भएकी आर्मीकै पुष्पा भण्डारीले १ घन्टा २४ मिनेट ३० सेकेन्डको दुरी निकालिन् । उनले १० हजार प्राप्त गरिन् ।

त्यस्तै १० किलोमिटर दौडको उपाधि सरिता बासीले जितिन् । बासीले निर्धारित दुरी ३९ मिनेट ३७ सेकेन्डमा पुरा गरिन् । दोस्रो भएकी लक्ष्मी पान्डेले ४० मिनेट १२ सेकेन्डको दुरी निकालिन् ।  त्यस्तै फुलमती रानाले ४० मिनेट १५ सेकेन्डको दुरी निकाल्दै तेस्रो स्थान हासिल गरिन् । १० किलोमिटरतर्फ पहिलो हुनेले २० हजार, दोस्रोले १० हजार र तेस्रो हुनेले ५ हजार प्राप्त गरे ।

यस्तै दौडमा तीन किलोमिटर, पाँच किलोमिटरको च्यारिटी वाकाथन समेत भएको थियो । नेपालमा पहिलोपटक भएको पिङकाथन दौड पिंकाथन इन्डियाको फ्रेन्चाइजकोरुपमा नेपालमा भएको हो । र, दौडको मुख्य उद्देश्य खेलकुदको माध्यमबाट महिलाको स्तन क्यान्सर रोगबारे आम महिला तथा जनतालाई जनचेतना फैलाउनु रहेको पिङकाथनको नेपाल च्याप्टर प्रमुख नमराज जोशीले जानकारी दिए ।