काठमाडौँ । धुर्मुस–सुन्तली फाउन्डेसनले काभ्रेको प्रहरी बस्तीबारे युट्युब च्यानलमा आएको भिडियो भ्रम छर्ने सुनियोजित कोसिस भएकाले अन्योलमा नपर्न सबैमा अनुरोध गरेका छन् । अघिल्लो वर्षको साउन २७ गते हस्तान्तरण गरेको पहरी बस्तीको संरचना कमजोर भएको भन्दै युट्युब च्यानलमा भिडियो हालिएपछि सिताराम कट्टेल धुर्मुसले यसको खण्डन गरेका हुन् ।
बाह्रखरीसँग कुराकानी गर्दै उनले भने, “पहरी बस्तीबारे नियोजित रूपमा भ्रम फैलाइयो । यस किसिमको हर्कतबाट कोही पनि विचलित नहुन म अनुरोध गर्छु ।”
उनले विपत्तिको बेलामा न्यून लागतमा संरचना तयार गरिएको बताउँदै प्रष्टिकरण दिए, “त्यतिबेला पालसमेत पाउन सक्ने अवस्था थिएन । पीडितहरू बारीको पाटामा, खुला आकाशमा रोग र शोकसँग जुद्धै थिए । हामीले घर बेच्ने प्रतीज्ञा गरेर बस्ती बनाएका हौँ, उनीहरूलाई ओत प्रदान गरेका हौँ ।”
“भूकम्पपीडितहरू खुला आकाशमा शरण लिइरहेको बेला हामीले रगत–पसिना गरेर बस्ती उभ्याएका हौँ । यसबारे भ्रम छर्ने कोसिस नगरियोस्,” उनले दुखेसो पोखे ।
बस्तीका एकाध मानिसहरू दिनरात मदिरामा लिप्त भएकाले उनीहरूले बस्तीको महत्व नबुझेको भन्दै उनले चिन्ता प्रकट गरे । “पहरी बस्ती पीडितहरूलाई बुझाएपछि हामी गिरान्चौर एकीकृत बस्ती बनाउन लाग्यौँ । अहिले दिनहीन मुसहरहरूलाई घर बनाउन चर्को धूपमा ढुंगा काँधमा राखेर हिँडिरहेका छौँ । यस्तो अवस्थामा हामीले उनीहरूलाई चेतना जगाएर बसिरहन सकेनौँ,” उनले प्रष्ट्याए ।
बस्ती पाएपछि पीडित आफैँले त्यसको संरक्षण गर्नुपर्ने दायित्व हुँदाहुँदै पनि कतिपय तत्वहरू अफवाह फैलाउन लागेको भन्दै उनले चिन्ता व्यक्त गरे । उनले आफू केही दिनमै पहरीबस्ती गएर समस्या बुझ्ने जानकारी दिए ।
फाउन्डेसनले ६७ लाख लागतमा भूकम्प गएको दोस्रो महिनाबाटै पहरी गाउँमा एकीकृत नमुना बस्ती बनाउन थालेको थियो । बस्ती बनाउन रकम नउठेपछि सिताराम कट्टेल धुर्मुस र कुञ्जना घिमिरे सुन्तलीले घर बेचेरै बस्ती बनाउने घोषणा गरेका थिए । तर देशविदेशमा सहयोग जुटेपछि उनीहरूले घरै बेच्न भने परेन । तथापि बस्ती बनाउँदा ६–७ लाख रुपैयाँ अपुग भएको धुर्मुसको दाबी छ । सिमेन्टको बलियो प्लाइबोर्ड राखिएकाले लात्ति वा मुड्किमै भत्कने कुनै हालतमा नसक्ने उनले ठोकुवा गरे ।
‘धुर्मस–सुन्तलीले बनाइदिएका घर मुड्कि हान्दै भत्कने’ शीर्षकमा केही दिनअघि युट्युब च्यानलमा भिडियो अपलोड भएको थियो । त्यो अहिले च्यानलबाट हटाइसकिएको छ ।