काठमाडौं । रोजगारीको सिलसिलामा मलेसिया पुगेका नेपाली कामदारमध्ये दैनिक एकजनाको मृत्यु हुने गरेको पाइएको छ । मलेसियामा अहिले ६ देखि ७ लाख नेपाली रहेको अनुमान गरिएको भए पनि एकिन भने कति छन् भन्ने पत्ता लाग्न सकेको छैन । 
कतिपय गैरकानुनी रुपमा पनि बसेको हुँदा एकिन संख्या नभएको मलेसियास्थित नेपाली दूतावासले जनाएको छ । 
तीन वर्षको तथ्यांक हेर्ने हो भने दैनिक १ नेपालीको मृत्यु हुने गरेको पाइएको छ ।  सन् २०१४ मा ३१४ जना नेपाली कामदारको मृत्यु भएको थियो । सन् २०१५ मा ४६१ जना र सन् २०१६ मा ३९२ जनाको मृत्यु भएको छ । सन् २०१६ मात्रै ४९ जनाले आत्महत्या गरेका छन् ।  के कारणले यति बढी नेपालीको मृत्यु हुने गरेको छ भन्ने पत्ता लगाउन मलेसियामा रहेको युनिभर्सिटी मलेसियाले अध्ययन थालेको मलेसियाका लागि नेपाली राजदुत डा. निरन्जनमान सिंह बस्न्यातले जानकारी दिए ।
त्यसका लागि नेपालबाट पनि केही चिकित्सकको टोली मलेसिया बोलाइएको उनले जानकारी दिए । राति सुतेको बेलामा धेरै नेपालीको ज्यान गएकाले के कारणले यस्तो भैरहेको छ भन्ने पत्ता लगाउन अनुसन्धान थालिएको उनको भनाई थियो ।

के कारणले दैनिक मृत्यु भइरहेको छ कामदारको ?
अनुसन्धानका क्रममा राति सुतेकै बेलामा धेरै कामदारको मृत्यु भएको पाइएको छ । केही कामकै क्रममा, केही दुर्घटनामा परे पनि धेरैजसोको मृत्यु राति सुतेको बेलामा भएको पाइएको राजदूत बस्न्यातले जानकारी दिए ।
मानसिक रुपमा टेन्सन हुनु, १२ घण्टा लगातार काममा खटिनु, आराम नहुनु, पानी कम पिउनु, खानाको सन्तुलन नमिल्नु, मापसे बढी गर्नु जस्ता कारण बढी देखिएको उनको भनाई थियो ।