काठमाडौ । इंग्लिश प्रिमियर लिग फुटबलमा म्यानचेस्टर सिटी र टोटनह्यामले बराबरी खेल्दै अंक बाडेका छन् । लिग अन्तर्गत शनिबार राति भएको खेलमा म्यानचेस्टर सिटी र टोटनह्यामले २–२ गोलको बराबरी खेल्दै अंक बाडेका हुन् ।
घरेलु मैदानमा भएको खेलमा दुई गोलको अग्रता जोगाउन नसक्दा सिटीले अंक बाड्न बाध्य भयो । पहिलो हाफ गोलरहित बराबरी भएको खेलमा चारै गोल दोस्रो हाफमा भएको हो । सिटीका लागि लेरोय साने र केविन डि ब्राउनले गोल गर्दा टोटनह्यामका डेल अली र सन हेङ–मिनले एक एक गोल गरे ।
प्रतिस्प्रधात्मक खेलमा ४९ औं मिनेटमा सानेको गोलबाट सिटीले अग्रता लिएको थियो । खेलको ५४ औं मिनेटमा ब्राउनले गोल गरेपछि सिटीले २–० को अग्रता लियो । तर, सिटीको दुई गोलको अग्रता टिक्न सकेन । खेलको ५८ औं मिनेटमा अलीले टोटनह्यामका लागि एक गोल फर्काए । त्यसपछि खेलको ७७ औं मिनेटमा सनले गोल गर्दै खेल २ – २ को बराबरीमा ल्याए ।
यो बराबरीपछि टोटनह्याम लिगको दोस्रो स्थानमा उक्लिएको छ । टोटनह्यामले २२ खेलबाट ४६ अंक जोडेको छ । म्यानचेस्टर सिटी भने २२ खेलबाट ४३ अंकसहित पाँचौं स्थानमा छ । एक खेल कम खेलेको शीर्ष स्थानको चेल्सीको ५२ अंक छ ।