काठमाडौं । इन्ग्लिश प्रिमियर लिग फुटबलमा लिभरपुल स्वान्सी सिटीसँग पराजित भएको छ । शनिबार राति भएको खेलमा लिभरपुल स्वान्सीसँग घरेलु मैदानमा ३ – २ ले पराजित भएको हो ।

लिभरपुलको घरेलु मैदान एन्फिल्डमा भएको नाटकीय खेलमा स्वान्सीलाई जित दिलाउन फर्नान्डो लोरेन्टेले दुई तथा सिगुड्सनले एक गोल गरे । लिभरपुलका रोबर्टो फिर्मिनोले दुई गोल गरे पनि टोलीको हार तार्न सकेनन् ।

लिभरपुलले खेल अवधिभर बल पोजिसनमा पकड जमाएको थियो । तर, पहिलो हाफ गोलरहित बराबरीमा सकिएको खेलको दोस्रो हाफमा स्वान्सीले सुरुवाती अग्रता लियो । दोस्रो हाफको तेस्रो मिनेटमा नै लोरेन्टेले गोल गर्दै स्वान्सीलाई अग्रता दिलाए । पहिलो गोल गरेको चार मिनेटपछि ५२ औं मिनेटमा लोरेन्टले व्यक्तिगत दोस्रो गोल गर्दै टोलीको अग्रता दोब्बर बनाए ।

खेलको ५२ औ मिनेटसम्म दुई गोलले पछि परेको लिभरपुलले खेलको ५५ औं मिनेटमा खेलमा फर्कियो । खेलको ५५ औं मिनेटमा फिर्मिनोले गोल गर्दै लिभरपुललाई खेलमा फर्काए ।

त्यसपछि ६९ औं मिनेटमा फिर्मिनोले नै व्यक्तिगत दोस्रो गोल गर्दै खेल २ – २ को बराबरीमा ल्याए । तर, खेलको ७४ औं मिनेटमा सिगुड्सनले गोल गर्दै स्वान्सीलाई ३ – २ को महत्वपूर्ण जित दिलाए ।

यो जितसँगै स्वान्सीले लिभरपुलमाथी उसैको घरेलु मैदानमा पहिलो पटक पराजित गर्न सफल भएको छ । साथै स्वान्सी रेलिगेशन जोनबाट समेत माथि उक्लिएको छ । स्वान्सीले लिगमा १८ अंक जोडेको छ ।

यता, स्वान्सीसंग पराजित लिभरपुल शिर्ष स्थानको चेल्सीभन्दा ७ अंकले पछि पारेको छ । तेस्रो स्थानको लिभरपुलले २२ खेलबाट ४५ अंक जोडेको छ भने एक खेल कम खेलेको चेल्सीको ५२ अंक छ ।