काठमाडौं । मुलक बाहिर नेपाली चलचित्रको बजार बिस्तार हुन नसकिरहेका बेला भारतीय चलचित्र बजारलाई लक्षित गर्दै नेपाली चलचित्र बन्ने भएको छ ।
निखिल उप्रेती, गोपल कायस्थ लगायतका केही व्यक्तिले चलचित्र बनाउन लागेका हुन् । “चलचित्रको कथा र निर्देशन निखिल कै रहनेछ,” चलचित्र वितरक कायस्थले भने, “लगानी निखिल, म र केही साथीहरुको रहनेछ ।”
स्क्रिप्ट तयार भइसकेको चलचित्रमा भारतीय कलाकार पनि खेल्नेछन् । कायस्थका अनुसार राम सेट्टी लगायतका भारतीय कलाकारले चलचित्रमा अभिनय गर्दैछन् । चलचित्रमा निखिल मुख्य पात्रका रुपमा रहनेछन् ।
चलचित्रमा दुई करोड लगानी गर्ने योजना रहेको सुनाउँदै कायस्थले भने, “नेपालमा पनि राम्रा चलचित्र बन्दा रहेछन् भनेर देखाउन चलचित्र बनाउन लागिएको हो । यो चलचित्रले नेपाली चलचित्रका लागि भारतीय बजारको बाटो खोलिदिनेछ ।”
भाषा र संस्कृति मिल्ने तथा चलचित्रको ठूलो बजार रहेको भारतमा नेपाली चलचित्र हलमा देखाउन सके नेपाली चलचित्रको स्तर माथि उठ्न सक्ने योजनासहित चलचित्र बनाउन लागिएको उनले बताए । चलचित्रको छायांकन चाँडै सुरु हुने कायस्थले जानकारी दिए ।
