काठमाडौं । पाहुना टोली इंग्ल्यान्डविरुद्दको एक दिवसीय सिरिज भारतले जितेको छ । कटकमा बिहीबार राती भएको दोस्रो एक दिवसीयमा पूर्वकप्तान महेन्द्र सिंह धोनी र युवराज सिंहको शतकीय पारीमा इंग्ल्यान्डलाई १५ रनले पराजित गर्दै भारतले सिरिज जितेको हो ।
बरबती स्टेडियममा भारतले दिएको ३८२ रनको लक्ष्य पछ्याएको इंग्ल्यान्डले निर्धारित ५० ओभरमा ८ विकेट गुमाएर ३६६ रन मात्रै बनाउन सक्यो । दोस्रो एकदिवसीय जितसंगै भारतले ३ खेलको सिरिज २ – ० ले आफ्नो बनाएको हो ।
भारतले पहिलो एक दिवसीयमा इंग्ल्यान्डलाई तीन विकेटले हराएको थियो । दुइ टोलीबीच एकदिवसीय सिरिज पछि ति – ट्वान्टी सिरिज खेल्ने छन् ।
भारतले प्रस्तुत गरेको उच्च लक्ष्य पछ्याउने क्रममा पाहुना टोलि इंग्ल्यान्डका कप्तान इयोन मोर्गानले १०२ तथा ज्यासन रोयले ८२ रन बनाए । यस्तै माइन अलीले ५५ र जोए रुटले ५४ रन जोडे । भारतका रविचन्द्रन आश्विनले तीन तथा जसप्रीत बुमराहले दुई विकेट लिए ।
यसअघि टस हारेर पहिले ब्याटिङको निम्तो पाएको भारतले युवराज सिंह र महेन्द्र सिंह धोनीको शतक मद्दतमा पुरै ५० ओभर खेल्दै ६ विकेट गुमाएर ३८१ रनको उच्च योगफल तयार गरेको थियो । भारतका लागि धोनीले १३४ रन तथा युवराजले १५० रन बनाए ।
इंग्ल्यान्डका क्रिस वोक्सले चार विकेट लिए ।