काठमाडौं । यसै हप्ता रिलिज हुन लागेको सुनिल ग्रोबरको चलचित्र ‘कफी विथ डी’ मा चलचित्रका नायक एक डरलाग्दा व्यक्ति ‘डी’ सँग अन्तर्वार्ता लिएपछि रातारात स्टार बन्छन् । यद्यपि चलचित्र निर्माण पक्षले ती ‘डी’ भन्ने व्यक्ति को हुन् भन्नेबारे अहिलेसम्म केही खुलाएको छैन ।

तर, तथ्यले ‘डी’ भन्ने शब्द मूलरुपमा अन्डरवर्ल्ड डन (भूमिगत गुन्डा) का लागि प्रयोग गरिन्छ भन्ने प्रमाण दिएको छ । जो कोही यो नाम लिन नै डराउँछन् । 
यसैबीच बलिउडका सदाबहार अभिनेता ऋषि कपुरले सार्वजनिक रुपमा अन्डरवर्ल्ड डनसँग एकैसाथ चिया पिएको कुरा स्वीकारेका छन् ।   

ऋषि कपुरले आफ्नो आत्मकथा ‘खुल्लम खुल्लाः अनसेन्सर्ड’ मा केही यस्तै खुलासा गरेका छन् जसलाई सुनेर सबै हैरान भए । पुस्तकमा ऋषि कपुरले लेखेका छन्, ‘सन् १९८८ मई  मा एक दिन म आफ्नो साथी बिट्टु आनन्दकहाँ पुगेँ । म एयरपोर्टबाट निस्किरहेको थिएँ । त्यतिकैमा एक अपरिचित मेरो अघि आए र, मलाई फोन समाउन लगाउँदै भने, “दाउद साहब बात करेंगे ।”

ऋषिले अघि लेखेका छन्, “दाउदले मलाई स्वागत गरे र उनले मलाई केही चिजको पनि आवश्यक्ता पर्यो भने म उसलाई भन्न सक्छु ।” 

यस पछि ऋषिले लेखेका छन्– उनलाई दाउदका दाहिने हात मानिने बाबाले दाउद उनीसँग चिया पिउन चाहेको कुरा बताए । र, साँझमा उनलाई लिन रोल्स रोयस पठाइयो । ऋषिलाई दाउदकहाँ यसरी पुर्याइयो कि उनलाई दाउदको घरको ठेगानासम्म थाहा हुन सकेन । ऋषिले लेखेका छन्, “हामी त्यहाँ पुग्यौँ तब दाउदले भने कि उनी रक्सी पिउँदैनन् न अरुलाई नै पिलाउँछन् । यसैले उनले चिया पिउन बोलाएका रहेछन् ।”

झण्डै चार घण्टासम्म चियाको सिलसिला चलिरह्यो । दाउदले ऋषिसँग उनको चलचित्र ‘तवायफ’ सारै मन परेको बताएछन् । किनभने त्यसमा ऋषिको नाम दाउद थियो । चलचित्रको माध्यमबाट ऋषिले दाउदको नाम महान बनाइदिएको पनि उल्लेख गरेछन् । 

ऋषिले पुस्तकमा भनेको छन्, “उनले मेरा पिता, काका, दिलिप कुमार, महमुद, मुकरीजस्ता अभिनेताहरू मन परेको बताए । मलाई याद छ त्यहाँ जानु अघिसम्म म थोरै डराएको थिएँ । तर, गएपछि म सारै रिल्याक्स भएँ ।”

यसपछि दाउद इब्राहिमले उनलाई केही माग्ने बारे सम्झाइ रहे । जसलाई उनले धेरै विनम्रतापूर्वक अस्विकार गरिदिएका थिए । 

जब ऋषि कपुरलाई दाउदले आफ्नो फोन नम्बर दिए, त्यतिबेलै दाउदले कैयौँ भारतीय नेतालाई आफूले गोजीमा राखेर हिँड्ने गरेको र उनीहरूलाई किनेको पनि बताए ।

ऋषि कपुरले भनेका छन्– उनले विवादबाट बच्नका लागि यस्ता खतरनाक ग्याङस्टारसँग टाढा रहनु नै राम्रो सम्झे । 
ऋषि कपुरले अगाडि लेखेका छन्– दाउद सधैँ उनीसँग राम्रो तरिकाले भेट गर्थे । उनीप्रति जहिल्यै नरम व्यवहार गरे । तर, थाहा भएन पछि के भयो उनले भारतका विरुद्ध यति ठूलो कदम उठाए ।