काठमाडौं । प्रधानमन्त्री पुष्पकमल दाहालले चौथोपटक मन्त्रिपरिषद् विस्तार गर्दैछन् । प्रधानमन्त्रीले संसद्मा एक एक सदस्य भएका दुई दलका नेतालाई बिहीबार मन्त्री बनाउन लागेका हुन् ।

प्रधानमन्त्री दाहालले अखण्ड पार्टी नेपालका अध्यक्ष कुमार खड्का र समाजवादी पार्टीका अध्यक्ष प्रेम बहादुर सिंहलाई मन्त्री बनाउन लागेको आजको नयाँ पत्रिका दैनिकले समाचार प्रकाशित गरेको छ ।

पहिलो पृष्ठको मुख्य समाचारमा बिहीबार दिउसो दुई मन्त्रीको शपथ हुने उल्लेख गरिएको छ । समाचारमा राप्रपा अध्यक्ष कमल थापा र मधेसी जनअधिकार फोरम (लोकतान्त्रिक)का अध्यक्ष विजय गच्छदार पनि सरकारका जाने लाइनमा रहेको उल्लेख गरिएको छ ।

थापालाई कांग्रेसबाट र गच्छदारलाई उनकै पार्टीभित्रैबाट अप्ठेरो परेको पनि समाचारमा उल्लेख छ ।

प्रधानमन्त्रीले भने मधेसी दललाई पनि समेट्ने र राप्रपालाई थप मन्त्रालय दिने गरी मन्त्रिपरिषद् विस्तारको तयारी गरेका छन् ।
यो समाचारलाई आजको राजधानी दैनिकले पनि पहिलो पृष्ठमै प्रकाशित गरेको छ ।

‘संशोधनमा दुई तिहाइको कसरत’ शीर्षकमा राजधानी दैनिकले समाचार प्रकाशित गरेको छ । त्यसको सब हेडमा साना दलबाट मन्त्री थपिँदै भन्ने उल्लेख गरिएको छ ।
पहिलो पृष्ठको तीन कोलममा यो समाचार प्रकाशित छ ।
आजको नागरिक दैनिकले भने दोस्रो पृष्ठमा प्रकाशित समाचारको शीर्षक राखेको छ – एक सिटे पार्टीलाई बारम्बार मन्त्री ।

निर्वाचन आयोगले आय व्यय नबुझाएको भन्दै खारेज गरेको दलका सांसदलाई नै प्रधानमन्त्रीले मन्त्री बनाउन लागेको समाचारमा उल्लेख छ । प्रेमबहादुर सिंहको पार्टीलाई निर्वाचन आयोगले खारेजी गरेको छ । 
कान्तिपुर दैनिकले पनि दुई मन्त्री थपिँदै भन्ने शीर्षकमा दोस्रो पृष्ठमा समाचार प्रकाशित गरेको छ । 

सामुदायिक स्कुल अब्बल
आजको कान्तिपुर दैनिकले बारा, हेटौंडा, नवलपरासी, बुटवल र रौतहटका संवाददाताले पठाएको समाचार एकीकृत गरी मुख्य समाचार बनाएको छ । 
‘सामुदायिक स्कुल अब्बल’ शीर्षकमा प्रकाशित समाचारमा राजधानीकै केही सामुदायिक विद्यालय बन्द हुने अवस्थामा पुगेका बेला मध्य तराइका सामुदायिक विद्यालयमा विद्यार्थीको चाप थामिनसक्नु भएको उल्लेख गरिएको छ । त्यसको मुख्य कारण प्रधानाध्यापकको नेतृत्व, शिक्षकको मिहिनेत, र नयाँ ढंगको पठनपाठन रहेको समाचारमा बताइएको छ ।

आजको कान्तिपुर दैनिकले पहिलो पृष्ठमा अख्तियार प्रमुखबाट अयोग्य घोषित लोकमानसिंह कार्कीले गरेका कामकारवाही संसद्को महाभियोग सिफारिस समितिले छानबिन गर्ने भन्दै समाचार प्रकाशित गरेको छ ।

रित्तिए बैंक
लगानीयोग्य पुँजी (तरलता) रित्तिएपछि बैंकहरू थप कर्जा दिन नसक्ने अवस्थामा पुगेका छन् ।
कर्जाको माग बढे पनि पछिल्लो एकडेढ महिना यता बैंकहरूसँग लगानीयोग्य पुँजी अभाव हुँदैगएको आजको अन्नपूर्ण पोस्ट दैनिकमा मुख्य समाचार प्रकाशित छ ।

अन्नपूर्ण पोस्टले आज उच्च अदालतका ८० जना न्यायाधीशले शपथ लिएको तस्बिरलाई मुख्य तस्बिरका रूपमा प्रकाशित गरेको छ ।
काठमाडौंमा सुरु भएको इन्टरपोलको सम्मेलनको मुख्य एजेण्डा अन्तरदेशीय अपराध चिर्ने संकल्प रहेको सम्बन्धी समाचार पनि पहिलो पृष्ठमै प्रकाशित छ ।
सम्पादकीय 
‘सर्वोच्च र चुनौती’ आजको अन्नपूर्ण पास्टले सम्पादकीय शीर्षक राख्दै भनेको छ –उच्च न्यायालयका न्यायाधीशहरूको नियुक्ति राजनीतिक भागबन्डाका आधारमा भएको, न्याय परिषद् विभाजित रहेको र त्यसप्रति नेपाल बारसँगै महान्यायाधिवक्ता तथा सरकारी वकिलहरूसमेतले असन्तुष्टि व्यक्त गरेको अवस्थामा न्यायपालिका नेतृत्वले कसको आडमा आफ्नो बचाउ गर्ला ?’

‘पाठ्यपुस्तक छपाइमा ढिलाइ’ शीर्षकमा कान्तिपुर दैनिकले सम्पादकीय लेखेको छ । ‘फागुन १ गतेदेखि शैक्षिक सत्र सुरु हुने पाँच जिल्लाको हकमा केन्द्रले समयमै पाठ्यपुस्तक नपुर्याउने निश्चित नै भएको छ,’ सम्पादकीयमा भनिएको छ ।

‘चुकेको मधेस–उठेको मधेस’ राजधानी दैनिकले सम्पादकीय शीर्षक राखेको छ । ‘१० वर्षमा प्राप्त राजनीतिक र सामाजिक उपलब्धि विस्तारै खुम्चदै जानेछ । आजका दिन कम्तीमा मधेस केन्द्रित राजनीति गर्नेहरूले सोच्नुपर्नेछ ।’