काठमाडौं । यसअघि बच्चा जन्माउन असमर्थ भनिएका एक जोडीकोे युक्रेनमा तीन जनाबाट अर्थात् ‘थ्री पर्सन आईभीएफ’ मार्फत् बच्चा जन्मिएको छ ।
द टाइम्सको रिपोर्टलाई उद्धृत गर्दै बीबीसीले जनाएअनुसार युक्रेनको राजधानी किएभका डाक्टरहरुले प्रोनुकुलर ट्रान्सफर भन्ने नयाँ तरिकाबाट बच्चाको जन्म भएको बताएका छन् ।
यो तरिकाबाट बच्चा जन्मिएको विश्वमा पहिलो भएको बताइएको छ । तीन जनाको डिएनएसहित बच्चा जन्मेको यो पहिलो पटक भने होइन । योभन्दा केही भिन्न तरिकाबाट एक बालक गत वर्ष मेक्सिकोमा जन्मेको थियो ।
युक्रेनका डाक्टरहरुले गम्भीर आणुवांशिक समस्या मिटोकोन्ड्रियाबाट पीडित महिलाका लागि स्वस्थ्य बच्चा जन्माउने उद्देश्यले थ्री पर्सन आइभिएफ विकास गरेका थिए । यस प्रविधिअन्तर्गत आमाको अस्वस्थ मिटोकोन्ड्रियाबाट र दाताको स्वस्थ मिटोकोन्ड्रिया डिम्बलाई संग्रह गरिन्छ ।
महिलाको शरीरको बाहिर प्रयोगशालामा स्पर्मको माध्यमबाट आइभिएफ प्रजनन गरिन्छ ।
यसबाट आमा, बाबु तथा डिम्ब दाताको डिएनएसहितको बच्चा पैदा हुन्छ । ब्रिटेनका विज्ञहरुले यसलाई एक उच्चस्तरीय प्रयोग भनेका छन् ।
यो सफल प्रयोगको नेतृत्व गरेका भालेरी जुकिनले परम्परागत आइभिएफबाट गर्भाधारण गर्न नसकेका युक्रेनी दम्पतिहरुका यो उपयोगी हुने बताए । भालेरीका अनुसार सोही अवस्थाको एक अर्को दोस्रो दम्पति पनि उनीहरुको क्लिनिकमा आएका छन्, जसले मार्चमा बच्चा जन्माउने छन् ।
बेलायतले यसअघि नै मिटोकोन्ड्रिया रोगबाट पीडित जोडीका लागि यो थ्री पर्सन आइभिएप लाई मान्यता दिइसकेको छ । तर, यस प्रविधिबाट बेलायतमा भने अहिलेसम्म बच्चा जन्मेको छैन ।