काठमाडौं । विश्वका सबैभन्दा धनी ८ जनासँग भएको सम्पत्ति विश्वका आधा जनसंख्यासँग भएको सम्पत्तिबराबर भएको बेलायतस्थित च्यारिटी संस्था अक्सफामले जनाएको छ ।
समाचार संस्था एएफपीका अनुसार स्विट्जरल्याण्डको दाभोसमा हुन लागेको ‘विश्व आर्थिक मञ्च’ को वार्षिक बैठक सुरु हुनुअघि अक्सफामले यस्तो रिपोर्ट सार्वजनिक गरेको हो ।
रिपोर्टका अनुसार विश्वका तल्लो वर्गका आधा जनसंख्याको सम्पत्ति स्वामित्वको अन्तर माथिल्लो वर्गकोे तुलनामा यसअघि अनुमान गरिएको भन्दा निकै फराकिलो रहेको भारत तथा चीनबाट प्राप्त तथ्यांकले देखाएको छ । विश्वका आधा जनसंख्याको बराबर सम्पत्ति होल्ड गर्ने आठ जना उद्योगपति अमेरिका, स्पेन र मेक्सिकोका हुन् ।
अक्सफामको रिपोर्टअनुसार विश्वका ३ अर्ब ६० करोड मानिससँग भएको सम्पत्ति ती ८ उद्योगपतिसँग छ । यो अवस्थाले समाजलाई छिन्नभिन्न पार्ने अक्सफामको तर्क छ ।
अक्सफामले चीन तथा भारतबाट आएको तथ्यांकका कारण सो संस्थाले एक वर्षअगाडिको आकलनलाई संसोधन गर्नुपरेको बताएको छ । अक्सफामले एक वर्षअघि विश्वको आधा जनसंख्यासँग रहेको सम्पत्ति विश्वका शीर्ष धनी ६२ जना उद्योगपतिसँग रहेको रिपोर्ट प्रस्तुत गरेको थियो ।
दाभोसमा मंगलबारबाट सुरु हुने ‘विश्व आर्थिक मञ्च’ बैठकको एजेन्डामा असमानता प्रमुख मुद्दा रहेको छ । शुक्रबारसम्म चल्ने सो बैठकमा विशिष्ट राजनीतिक तथा आर्थिक क्षेत्रका करिब ३ हजारले सहभागिता जनाउने बताइएको छ ।
