काठमाडौं । ऊर्जामन्त्री जनार्दन शर्माले उद्योगले मागे जति बिजुली दिने बताएका छन् । “उद्योग सञ्चालनका लागि कति ऊर्जा चाहिन्छ त्यसको योजना तयार गर्नुस्, मैले १ वर्षपछि १ हजार मेगावाट बिजुली उद्योगलाई उपलब्ध गराउन सक्छु”उनले भने ।
नेपाल उद्योग वाणिज्य महासंघले मंगलबार राजधानीमा आयोजना गरेको छलफल कार्यक्रममा ऊर्जामन्त्री शर्माले उद्योगलाई विद्युत आपूर्ति गर्न औद्योगिक फिडर बनाउने तयारी भएको सुनाए ।
उनले गत वर्षको तुलनामा भारतबाट ४० मेगावाट मात्र बिजुली थप भएको बताउँदै भारतको बिजुलीले मात्र लोडसेडिङ नहटेको जानकारी दिए । लोडसेडिङ नभएपछि औद्योगिक तथा होटलमा मासिक लाखौं रुपमा बचत भएको उनले जानकारी दिए ।
उनले ठूला आयोजना बनाउनका लागि विद्युत उत्पादन कम्पनी प्रसारणलाइन बनाउन ग्रीड विकास कम्पनी आयोजनाको सम्भाव्यता अध्ययन गर्न इन्जिनियरिङ कम्पनी र विद्युतको व्यापार गर्न विद्युत व्यापार कम्पनी गठन भएको उनले जानकारी दिए ।
उद्योगी व्यवसायीको सहकार्यमा विद्युत उत्पादनको काम अघि बढाउन सरकार तयार रहेको उनले बताए । उनले जलसाययुक्त र अर्धजलासययुक्त आयोजनाको विद्युत खरिदबिक्री दर (पीपीए) तय गरेको बताउँदै यस्ता आयोजनामा लगानी गर्न निजी क्षेत्रलाई अनुरोध गरे ।
यस्तै अमेरिकी डलरमा पीपीए गर्नका लागि आवश्यक जोखिम बहन गर्नका लागि हेजिङ फण्डको स्थापना, प्रतिमेगावाट ५० लाख रुपैयाँ अनुदान, लेउ वा देउ (टेक अर पे ) पीपीए नीति लागु गर्ने बताए । “मैले मन्त्रालयमा निर्णय गरिसकेको छु” उनले भने “तपाईहरुले सुविधा पाउनुभएको छैन । परिणाम आउन मात्र बाँकी छ ।”
जलासययुक्त आयोजनाबाट तल्लोतटीय लाभ लिने विषयमा छलफल अघि बढाएको उनले बताए ।