काठमाडौं । व्यापार, मनोरञ्जन, सामाजिक कार्य, राजनीतिलगायत विभिन्न क्षेत्रमा आफ्नो विशिष्ट पहिचान बनाएका डोनाल्ड ट्रम्पले आगामी जनवरी २० मा अमेरिकाको ४५ औं राष्ट्रपतिका रूपमा शपथ ग्रहण गर्दैछन् । ट्रम्पले उठाएको आप्रवासनको मुद्दा शक्तिशाली बन्यो र उनले विजय प्राप्त गरे भन्ने अनुमान छ । उनको रुढ तर दृढ विदेश नीतिका कारण पनि मत प्राप्त भएको हो भन्ने विश्लेषण पनि छ । तर, यी विश्लेषण हेरिरहँदा डोनाल्ड ट्रम्प अमेरिकामै जन्मिएका भए पनि उनका हजुरबा-हजुरआमा जर्मन प्रवासी थिए । उनका बुबाआमा स्कटिस आप्रवासी थिए । 
१४ जुन १९४६ मा न्युयोर्कको क्विन्समा जन्मिएका डोनाल्ड ट्रम्प स्कटिस प्रवासी फ्रेड र मेरी मेक्लियाडका सन्तान हुन् । डोनाल्ड ट्रम्प पाँच भाइबहिनीमध्येका चौथौ हुन् । सन् १९६८ मा ट्रम्पले युनिभर्सिटी अफ पेन्सिलभानियाको वर्टन स्कुल अफ फाइनान्सबाट अर्थशास्त्रमा ग्य्राजुएसन गरेका थिए । 
ट्रम्पको जीवनमा एक समय यस्तो पनि आयो कि उनी सडकमा नै आउनुपर्ने भयो । ट्रम्पका लागि सन् १९८० निराशा लिएर आयो । तर, उनी सम्हालिए र अन्ततः बिलिनियर बने । डोनाल्ड ट्रम्पले २५ वर्षको उमेरमा आफ्ना बुबाको कम्पनी सम्हालेका थिए । सन् १९६९ मा निर्माण कम्पनी ‘एलिजाबेथ ट्रम्प एण्ड सन्स’ कम्पनीका लागि उनले काम गर्न सुरु गरेका थिए । 
सन् १९७१ मा बुबाको कम्पनी सञ्चालन गर्दै गर्दा नाम परिवर्तन गरेर ट्रम्प अर्गनाइजेसन बनाए । बुबाबाटै प्रभावित भएर उनले रियल इस्टेट व्यवसाय पनि सुरु गरे । सन् १९७७ मा ट्रम्पले इवानासँग विवाह गरे । यो वैवाहिक जीवन १४ वर्षसम्म रह्यो । १९९३ मा मार्लासँग दोस्रो विवाह गरे, जुन ६ वर्षसम्म टिक्यो । त्यसपछि तेस्रो विवाह गरेर सन् २००५ देखि ट्रम्पले दक्षिण स्लोभानियाकी मोडल मेलानियालाई सँगै राखे । 

‘ट्रम्प टावर’ देखि र ‘पावर’ निर्मातासम्म 
सन् १९८२ मा ‘ट्रम्प टावर’ को निर्माण पूरा भयो । यो बिल्डिङ ट्रम्पको बिजनेस हेडक्वार्टर हो । यो राष्ट्रपति अभियानको समेत हेडक्वार्टर थियो । सन् २००० मा ट्रम्पले पहिलो पटक ‘रिफर्म पार्टी’का तर्फबाट राष्ट्रपति पदमा उमेदवारी दिएका थिए । तर, दुईवटा ‘प्राइमरी’ जितेर बाहिरिए । 
सन् २००४ मा ट्रम्पको रियालिटी शो ‘द अप्रेन्टिस’को प्रसारण गरियो । यसको निर्माता र प्रस्तोता स्वयम् ट्रम्प नै थिए । सन् २००७ मा ‘हलिउड वक अफ फ्रेम’ मा ट्रम्प छनोट भए । २०१५ मा उनले रिपब्लिकनका तर्फबाट राष्ट्रपति पदमा उमेदवारी दिए ।   
टेलिभिजन प्रस्तोताका रूपमा रहेका ट्रम्पले लेखेको पुस्तक अत्यधिक बिक्री भएको पुस्तक पनि भयो । सन् १९८७ मा ट्रम्पले ‘आर्ट अफ द डिल’ लेखे, जुन पुस्तक न्युयोर्क टाइम्सको बेस्टसेलर लिस्टमा ५१ हप्तासम्म रह्यो । ‘नेभर गिभअप’, ‘थिङ्क बिग एण्ड किक एस इन’, ‘बिजनेस एण्ड लाइफ’, ‘ट्रम्प १०१ : द वे टु सक्सेस’, ह्वाइ बि वान्ट यु टु बि रिच’, र ‘थिङ्क लाइक अ बिलिनियर’लगायत पुस्तक ट्रम्पले लेखेका हुन्  ।
-बायोग्राफी डटकमबाट अनूदित