काठमाडौं । समुद्रमा सवार यात्रुवाहक जहाज डुब्दा यमनमा ६० जना बेपत्ता भएका छन् । शनिबार यमनको हाद्रमाउट प्रान्तको अल मुकालादेखि अरब सागरको सोकोत्रा आइल्याण्डका लागि हिँडेको जहाज बुधबार बेपत्ता भएको हो । यमनका सरकारी अधिकारीका अनुसार चार यात्रुको उद्धार गरिएको छ । 

भारतीय सञ्चारमाध्यम दैनिक भाष्करका अनुसार व्यावसायिक जहाजद्वारा ती व्यक्तिको उद्धार गरिएको बताइएको छ । मन्त्रालयका अधिकारी फाहद कफाएनले स्पेन र यमनका केही व्यावसायिक जहाजद्वारा उद्धार कार्य जारी राखिएको जानकारी दिए । यमनमा नागरिक युद्ध सुरु भएपछि हाद्रमाउटबाट सोकोत्रा आइल्याण्ड जाने हवाई उडान बन्द गरिएको थियो । त्यस ठाउँमा यात्रा गर्नेहरुले यस्तै कार्गो जहाजबाट यात्रा गर्नुपर्ने हुन्छ । 
सरकारी अधिकारी फाहद कफाएनका अनुसार जहाजमा यात्रुहरुसँगै १२ वटा साना डुंगासमेत थिए । यी डुंगाहरु सोकोत्राका माझीहरुका लागि उपहारका रूपमा लगिँदै थियो ।