काठमाडौं । सोमबार पनि सेयर बजारमा सुधार आउन सकेन । आइतबार झण्डै ३० अंक घटेको बजार सोमबार २६ अंक घटेर नेप्से परिसूचक १ हजार ५४४ अंकमा सीमित भएको छ । दुई दिनमा बजार ५६ अंक घटेको छ । सेयर बजार घटेपछि सोमबारमात्र लगानीकर्ताले २९ अर्ब ३२ करोड रुपैयाँ गुमाएका छन् । सोमबार बजार घटेर पुँजीकरण १७ खर्ब १८ अर्ब ६० करोड रुपैयाँमा सीमित भएको छ । आइतबार बजार पुँजीकरण १७ खर्ब ४७ अर्ब ९३ करोड रुपैयाँ थियो ।
सोमबार उत्पादनमूलक क्षेत्रको सामान्य वृद्धि बाहेक बैंक, होटल, विकास बैंक, जलविद्युत्, बिमाको सेयर मूल्य घटेको छ । सोमबार सबैभन्दा बढी सेयर बिमा समूहको घटेको छ । बिमाको सेयर १७३ अंक घटेको छ ।
सोमबार सबैभन्दा बढी सेयर कारोबार सिद्धार्थ बैंकको भएको छ । सिद्धार्थको प्रतिसेयर १ हजार ३० रुपैयाँमा ११ करोड ८३ लाख रुपैयाँको सेयर किनबेच भएको छ । सिद्धार्थले आर्थिक वर्षमा गरेको नाफाबाट सेयरधनीलाई ४८.७ प्रतिशत बोनस सेयर दिने र चुक्तापुँजी बढाउन ३९ प्रतिशत हकप्रद सेयर पनि निष्कासन गर्ने भएपछि सेयर कारोबार बढेको हो । सोमबार ६४ करोड ८२ लाख रुपैयाँको सेयर कारोबार भएको छ ।