काठमाडौं । डा. गोविन्द केसीको माग पूरा गराउन लागिपरेको भन्दै स्थास्थ्य मन्त्री गगन थापालाई पार्टीभित्रैबाट दबाव र धम्की आएको छ ।
स्रोतका अनुसार डिन केपी सिंहलाई राजीनामा गर्न लगाएको र डा. जगदिश अग्रवाललाई डिन बनाउन लागिपरेको भन्दै उनलाई पार्टीभित्रैबाट दबाव आएको हो ।
“डिन केपी सिंहलाई नै निरन्तरता दिनुपर्छ भन्ने र जगदिश अग्रवाललाई बनाउनै हुँदैन भनेर पार्टीभित्रैबाट लागेकाहरुले नै पार्टीमा फर्किनुपर्ला भनेर धम्की दिएका छन्,” थापा निकट स्रोतले भन्यो ।
मन्त्री थापालाई ‘मन्त्रीबाट हटेपछि त पार्टीमै आउनुपर्ला नि, त्यसबेला हामीले पनि जानेका छौं’ भन्दै धम्कि दिएका थिए ।
स्रोतले यस्तो भन्नेहरु पार्टीभित्रैका जिम्मेवार नेताहरु रहेको बतायो । 
तर थापाले भने यसबारेमा केही बताउन चाहेका छैनन् । थापा निकट स्रोतका अनुसार शिक्षा मन्त्रालयको क्षेत्राधिकारभित्र पर्ने विषयमा पनि थापाले जोड गरेको, पार्टीबाटै सिफारिसमा परेका डिन हटाउन भूमिका खेलेको भन्दै धम्की दिइएको हो ।
पछिल्लो तीन दिन लगातार बैठक राखेर थापाले केसीका माग पूरा गराउन भूमिका निर्वाह गरेका थिए ।
थापाकै प्रस्तावमा सरकारले केसीसँग वार्ता गर्न वार्ता समिति बनाएको थियो । सिंहले मन्त्री थापाकै आग्रह र दवावमा राजीनामा दिनुपरेको गुनासो गरेपछि उनलाई पार्टीभित्रैबाट यस्तो धम्की आएको स्रोतले जानकारी दियो ।  डा केसीको दोस्रो मागको रुपमा रहेको भीसीको राजिनामाका लागि पनि थापाले आवश्यकता भन्दा बढी पहल गरेको धम्की दिनेको आरोप रहेको छ ।
“शिक्षा मन्त्रालयको क्षेत्राधिकारभित्र रहेको विषय पनि स्वास्थ्यकै झैं गरेर अघि बढेको भन्दै पार्टीका केही नेता र स्वास्थ्यकर्मीले यसरी धम्क्याएका हुन सक्छन्,” स्रोतले भन्यो ।
स्वास्थ्य मन्त्री थापाका सल्लाहकार प्रताप पौडेलले नवौं अनशनका बेला नै प्रधानमन्त्री, शिक्षा मन्त्री लगायतलाई भेटेरै थापाले केसीले उठाएका मागमध्ये वरिष्ठताकै आधारमा डिन नियुक्त गरिदिन आग्रह गरेको बताए । उनले त्यसबेला नै गरिदिएको भए अहिले दशौं अनशन बस्ने अवस्था नआउने बताए ।
मन्त्री थापाले ६ महिनादेखि बस्न नसकेको काउन्सिलको बैठक राखेर मेडिकल कलेजहरुको सिट निर्धारण, ७ प्रदेशमा मेडिकल कलेज स्थापनाको प्रक्रिया अघि बढाएको, संसद्मा रहेको मनमोहन मेडिकल प्रतिष्ठान सम्बन्धी विधेयक फिर्ता,  नयाँ सम्बन्धन नदिने पहल लगायतका काम यसअघि नै गरेको सल्लाहकार पौडेलले बताए ।