काठमाडौं । अमेरिकाको वासिङ्टन डीसीबाट दोहा आउँदै गरेको कतार एयरवेजको उडान नम्बर QR ८०७ जहाज पोर्चुगलमा आकस्मिक अवतरण गर्नुपरेको छ ।
पोर्चुगलको पश्चिमी टापुमा रहेको लाजेस विमानस्थलमा सो जहाज आकस्मिक अवतरण गर्नुपरेको थियो । नेपाली समयअनुसार बिहान ७ः४५ मा डीसीबाट उडेको जहाज पाँचघण्टापछि ठूलो ‘टर्वुलेन्स’  (खराब मौसम ) मा परेको थियो ।  खराब मौसममा परेपछि जहाज असन्तुलन भएको थियो । 
टर्वुलेन्समा परेपछि जहाजभित्रै कम्तिमा दश जना घाइते भएको सोही जहाजमा सवार अलजजिराका पत्रकार आजाद एसाले बाह्रखरीलाई जानकारी दिए ।
उनका अनुसार घाइते भएका सबैजसो सिलिङमा ठोक्किएका थिए । ‘टर्बुलेन्स’ परेर सिटमा रहेका एक बालक उछिट्टिएर आयलमा ठोक्किएका थिए ।
अलजजिराका पत्रकार एसाले दिएको जानकारीअनुसार उक्त जहाजमा ५ देखि ८ जना नेपाली पनि सवार छन् । यात्रामा रहेका सबै नेपाली सकुशल रहेको उनले जानकारी दिए ।
घाइतेहरु सबैलाई स्थानीय पोर्चुगलको स्थानीय एक अस्पतालमा लगिएको छ । घाइतेमध्ये एकजनाको अवस्था गम्भीर छ । लाजेस विमानस्थलमा रहेका सबै यात्रुलाई अर्को जहाजमार्फत दोहा ल्याउने प्रयास गरिएको छ । यसैबीच अमेरिकी नागरिकलाई पोर्चुगलकै एक होटलमा लगिएको छ भने अन्य देशका नागरिकलाई भिसा नभएका कारण विमानस्थलमै राखिएको छ ।

तस्बिर सौजन्यः आजाद एसा /@flightradar24