काठमाडौं । पदीय दायित्व पूरा नगरेको भन्दै ऊर्जा मन्त्रालयले नेपाल विद्युत प्राधिरकणका ३ जना सञ्चालकसँग स्पष्टिकरण मागेको छ ।
विद्युत् प्राधिकरणका अध्यक्षसमेत रहेका ऊर्जासचिव अनुपकुमार उपाध्यायले नेपाल विद्युत् प्राधिकरण ऐनअनुसार काम कर्तव्य पुरा नगरेको, सञ्चालकको हैसियतले कार्यसम्पादन नगरेको पाइएको भन्दै ३ जना सञ्चालकलाई स्पष्टिकरण सोधेका छन् । सञ्चालक मनोजकुमार मिश्र, लक्ष्मणप्रसाद अग्रवाल र सुरज लामिछानेलाई स्पष्टिकरण सोधिएको हो ।
नेपाल विद्युत प्राधिकरण ऐनको दफा १९ बमोजिम काम कर्तव्य र अधिकारभित्र रही काम नगरेको, बोर्ड बैठकको माइन्युटमा लामो समयदेखि हस्ताक्षर नगरी संस्थालाई आर्थिक रुपमा नोक्सान पु¥याएको र अनधिकृत रुपमा बोर्ड बैठकको निर्णय भनी विभिन्न सञ्चार माध्यमहरुमा झुटा विवरण दिई संस्थाको गरिमा र काम कारवाहीमा असर परेको आरोप लगाइएको छ ।
स्पष्टिकरण पेश नगरे वा सन्तोषजनक नभए कारवाहीस् अघि बढाउने स्पष्टिकरणमा उल्लेख गरिएको छ ।
नेपाल विद्युत प्राधिकरणका सञ्चालकहरुले कार्यकारी निर्देशकलाई असहयोग गर्न थालेपछि उर्जा मन्त्रालयले यस्तो स्पष्टिकरण माग गरेको हो ।
सञ्चालक र कार्यकारी निर्देशक कुलमान घिसिङबीच विभिन्न आयोजना अघि बढाउनका लागि कम्पनी गठन गर्ने विषयमा विवाद बढेपछि प्राधिकरणका कतिपय निर्णय प्रभावित हुने अवस्था आएको छ । सञ्चालकको असहयोगले मुलुकलाई लोडसेडिङमुक्त बनाउने प्राधिरणको योजना प्रभावित हुने भएको छ ।